聽人講深水埗維記的豬潤麵一流，但一路都冇去試吓，早前驗完身，在取驗身報告那天自己終於的起心肝去了一敞，事關都唔知自己驗身合格與否，豬潤這等高危食物可能唔適合再食，所以都係早食早著了。

這日平日下午兩點零鐘到達，人不是很多有空位坐下不用等位，這裡格局是簡陋茶檔款，點了招牌菜豬潤麵($21)及咖央多($8)，兩樣食物好快就送上檯，之前見過其他人介紹維記時相片那碗豬潤麵湯面滿是西人稱為scum的肉渣，賣相都幾嚇人，相信好多西人都未必夠膽食，但我這碗則只有些少，還能夠見到清澈的湯，先飲一口湯，兒時對這味道之回憶就不斷浮現，記得小時候婆婆常常煲豬潤水俾還是BB的細佬飲，自己久不久都會飲一些，那種味道真的十分相似，只是現在這湯添加了鹹味，那股用來辟腥的薑味，濃濃的豬潤鮮甜味，都和兒時所喝到的一個模樣，麵條沒有煮得過腍，麵與這個湯十分配合，豬潤雖然唔係黃沙潤，但因為生熟程度拿揑準確，雖然只是普通豬潤，但依然軟熟沒有硬崩崩，整碗麵的確好吃。

那咖央多多士夠厚烘得又夠脆，但那咖央我覺得唔係好香，無論蛋香椰香我都覺得比不上朋友在馬拉帶回來之樽裝咖央，但食得奶油多士多，復一復古之口味都唔錯，那杯凍奶茶未及茶檔應有之水準，茶味太淡，不過這裡獨孤一味賣豬潤麵已可要我再次回頭了。